ન મોકલાવ

ડૂસકાં રોકવા તું મને પ્યાલા ન મોકલાવ
આવવું હોય તો આવ, ખોટાં ખુલાસા ન મોકલાવ

જાણે છે સારી રીતે હું ફૂલોનો ચાહક છું!
પર્ણોમાં નકલી, તું મને ગુલાબ ન મોકલાવ

સમજે છે બરાબર, હું લાગણીઓ પર્યાય છું
ટહૂકા સાથ અસલી મને પાનખર ન મોકલાવ

જૂએ છે રોજ તું, હું ડૂબતી નૌકા છું
કિનારાની લાંચ આપી, દિલાસા ન મોકલાવ

( માધુરી દેશપાંડે )

3 thoughts on “ન મોકલાવ

  1. સરસ.

    આ વાંચીને આદિલ સાહેબની આ જ રદીફ પરની ગઝલ યાદ આવી ગઈ.

    તું વાતે વાતે શબ્દના ભારા ન મોકલાવ
    તારા વિશેના અમને દિલાસા ન મોકલાવ

    મંઝિલ તો ઝાંઝવાનું બીજું રૂપ છે અહીં
    તું એને શોધવા વધુ રસ્તા ન મોકલાવ

    જે આંખમાં રહેતો હતો ચહેરો કોઈનો
    વેરાન એવી આંખમાં સપના ન મોકલાવ

    આકાશ લઈને ચાંદ તો ડૂબી ગયો, હવે
    અવકાશ ભરવા અમથા સિતારા ન મોકલાવ

    છલકે છે બેઉ કાંઠે હજી પૂર શબ્દના
    તળિયેથી તારા મૌનના પડધા ન મોકલાવ

    આંસુ વહીને જાય છે પગલાંની શોધમાં
    બીજી તરફથી એને તું પાછાં ન મોકલાવ

    બેસી પલાંઠી વાળીને સૂરજની વચ્ચોવચ
    છ અક્ષરોના નામના દીવા ન મોકલાવ

    હંધાય આલા ખાચરો જે બેઠા ડાયરે
    તે સૌને ઘોળી ઘોળી કહુંબા ન મોકલાવ

    પૂરી થઈ નથી હજી જીવનની આ ગઝલ
    અધવચ્ચે આમ અટકીને મકતા ન મોકલાવ

    વરસ્યો’તો ધોધમાર તો વરસ્યા જ કર હવે
    આદિલના દિલમાં યાદના છાંટા ન મોકલાવ

    -આદિલ મનસૂરી

  2. ઉપરની ગઝલ આદિલ સાહેબે રમેશ પારેખને યાદ કરીને લખી છે તો રમેશ પારેખે લખેલી આ જ રદીફ પરની ગઝલ જુઓ –

    આંખોમાં આવી રીતે તું દૃશ્યો ન મોકલાવ
    ખાલી થયેલ ગામમાં જાસો ન મોકલાવ

    ફૂલો ય પૂરબહારમાં હિંસક છે આજકાલ
    રહેવા દે, રોજ તું મને ગજરો ન મોકલાવ

    તું આવ કે પાડી રહ્યો છું સાદ હું તને
    પહાડોની જેમ ખોખરો પડઘો ન મોકલાવ

    ખાબોચિયું જ આમ તો પર્યાપ્ત હોય છે
    હોડી ડુબાડવાને તું દરિયો ન મોકલાવ

    થોડોક ભૂતકાળ મેં આપ્યો હશે કબૂલ
    તું એને ધાર કાઢીને પાછો ન મોકલાવ.

    – રમેશ પારેખ.

Leave a Reply

Your email address will not be published. Required fields are marked *