આખી રાત વરસ્યો વરસાદ

ને તોય મારું આયખું કોરું કટ્ટ

આંખોની પાંપણો રાહ જોઈ થાકી,

ને રોઈ-રોઈ થાકી,

પણ તારો અણસાર જરાયે નહીં.

અંધારી રાત જાગી-જાગીને કાપી,

ને ઘૂંટી-ઘૂંટીને વાટી,

ને તોય રહ્યો ઓરસિયો કોરોકટ્ટ

ઉઘડે સવાર ને વેરાય તડકો,

તડકાના ફૂલો, ને ફૂલોનો તડકો

ખોબો ભરી અડાડું આંખે

ને ફૂલ બધાં બની જાય-

ઝાકળિયાં મોતી…

ને મોતી વેરાણાં છાતીના ચોકમાં,

ને તોય મારું આયખું કોરું કટ્ટ

રાત આખી વરસ્યો વરસાદ

ને તોય મારું આયખું કોરું કટ્ટ

( દુર્ગેશ ઉપાધ્યાય )