અટકળ કળી શકાશે નંઈ, સહેજમાં મળી શકાશે નંઈ,
ક્રિયાપદોના કૂંડાળામાં, શબ્દને છળી શકાશે નંઈ.
.
વડવાયુંની વચમાં બાંધ્યા
સુગરીઓએ માળા,
ગામની વચ્ચે સીમ ફૂટ્યાના
થઈ રહ્યા હોબાળા,
.
શેઢા પરના આવળ-બાવળ લણી શકાશે નંઈ,
અટકળ કળી શકાશે નંઈ; સહેજમાં મળી શકાશે નંઈ,
.
ઝાકળ જેવું આંખમાં ફૂટ્યું
પગને ફૂટ્યાં પાન,
માણસ થઈને બન્યો ચાડિયો
ગાઈને લીલાં ગાન,
.
ભર્યા ભાદર્યા ખેતર વચ્ચે ફરી શકાશે નંઈ,
અટકળ કળી શકાશે નંઈ, સહેજમાં મળી શકાશે નંઈ.
.
નદી કિનારે ભીની રેત પર
લખીને થાક્યો નામ,
હાથ હલેસાં, તનની હોડી,
જાવું સામે ગામ,
હોડી મધ્યે ઝીણો છેદ છે, તરી શકાશે નંઈ,
અટકળ કળી શકાશે નંઈ, સહેજમાં મળી શકાશે નંઈ.
.
( ડાહ્યાભાઈ પટેલ “માસૂમ” )
khuba sundar rachana
khuba sundar rachana