ઓરમોર ચારેકોર ઊછળે છે દરિયાનો વૈભવ રે અલ્લાલાબેલી,
તરશું ડૂબશું સાથે વહેશું ભવોભવ રે અલ્લાલાબેલી.
.
ડગમગ નવના ફોતરે જંગ જીવતરના જીતવા અલ્લાલાબેલી,
ભીતરમાં કોણ આ કોતરે પ્રસંગ કળતરના મિતવા અલ્લાલાબેલી.
જળ ચોપાસ પણ દિલમાં લાગે દવ રે અલ્લાલાબેલી,
તરશું ડૂબશું સાથે વહેશું ભવોભવ રે અલ્લાલાબેલી.
.
આભ હો વાદળીયા પણ મનમાં ખાલીપાના આભાસ અલ્લાલાબેલી,
ગાભ હો વીજળીયા પળભરમાં માલીપાના અજવાસ અલ્લાલાબેલી.
ગાજવીજ ગોરંભાયા તાંડવ રે અલ્લાલાબેલી,
તરશું ડૂબશું સાથે વહેશું ભવોભવ રે અલ્લાલાબેલી.
.
હારેલાં હલ્લેસે શ્વાસનાં પંખી સૂસવાતા સઢમાં અલ્લાલાબેલી,
થાકેલા ઉલ્લાસે યાદના સંગી ઘૂમરાતા ગઢમાં અલ્લાલાબેલી.
ઘૂઘવાતા પવનમાં કોના રવ રે અલ્લાલાબેલી,
તરશું ડૂબશું સાથે રહેશું ભવોભવ રે અલ્લાલાબેલી.
.
( અવિનાશ પારેખ )