નિજત્વમાં જોયું ને પરત્વમાં જોયું
મેં જ્યારે જ્યારે મારું ઘર મમત્વમાં જોયું
.
અકળ ! તમેય પણ ત્યારે અકળ ન દેખાયા
પ્રયોજનોની પાર જો સમત્વમાં જોયું
.
મળ્યું શું-તંતુ તંતુ ખોલ્યા જ્યારે સૂતરના
શું ફાયદો જો ખમીસને મેં સ્વત્વમાં જોયું
.
મેં ધૂળ ખંખેરીને જોયું ધૂળનું ઢેફું
હવાની સોંસરું મેં એક સત્વમાં જોયું
.
સુગંધ શબ ઉપર હતી ને પૂજામાંય હતી
ગુલાબ ક્યારે અને કયા મહત્વમાં જોયું !
.
મકાન ઉઘાડ્યું તો એક બોધિવૃક્ષ જોયું મેં
શરીર ઉઘાડીને મેં બોધિસત્વમાં જોયું !
.
( લલિત ત્રિવેદી )