આપણી વચ્ચે નિકટતા એમ વીકસતી રહે
જેમ કોઈ વૃક્ષ ઉપર વેલ વિસ્તરતી રહે
.
ગામ ભૂલેલી નદીની જેમ અટવાયા કરું
નામ ભૂલેલી નદીની જેમ તું વહેતી રહે
.
દ્રશ્ય ને અદ્રશ્યનું ભેગા થવું સંભવ બન્યું
હું તને જોતો રહું ને તું મને સ્મરતી રહે
.
સ્પર્શક્ષમ સાંનિધ્ય સાચે બહુ જ દુર્લભ હોય છે
આમ તો બે-ચાર દિવસે તું મને મળતી રહે
.
છે મુબારક સૌને પોતાનું નિરાકારી ગગન
આપણી સામે હંમેશા આપણી ધરતી રહે
.
હોઈએ તખ્તા ઉપર કે હોઈએ નેપથ્યમાં
આપણામાં માણસાઈ સર્વદા શ્વસતી રહે
.
( હિતેન આનંદપરા )