આમ તો મનને જ પાછું વાળવા જેવું હતું,
પગ મૂક્યા પહેલાં જ સંભાળવા જેવું હતું !
.
ધાર્યુઁ’તું કે પહોંચતાં સ્વાગત થશે, ઉત્સવ થશે,
આપણે આ ભોળપણ ઓગાળવા જેવું હતું !
.
દીપમાળાઓ બધે પ્રગટાવી તેં સારું કર્યુઁ,
પણ પ્રથમ તો આંગણું અજવાળવા જેવું હતું !
.
લે હવે અવ્યક્તનો આનંદ પણ ઓછો થયો,
હોઠ પર આવી ગયું તે ખાળવા જેવું હતું !
.
અર્થ ન્હોતો કોઈ ઈચ્છા કે કશા સંકલ્પનો,
એમને એમ જ બને તો ન્યાળવા જેવું હતું !
.
( રાજેન્દ્ર શુક્લ )