સંબંધના સમુદ્રને ડહોળી રહ્યો છું હું,
નિર્મળ હૃદયના પ્રેમને ખોળી રહ્યો છું હું.
.
હું કંઈ અમસ્તો જોતો નથી એની આંખમાં,
વરસોની ઓળખાણને ખોળી રહ્યો છું હું.
.
મારી કશી દખલ નથી, દિલનો વિવેક છે,
જેના ઉપર પસંદગી ઢોળી રહ્યો છું હું.
.
નિખરીશ એવો, નિરખીને સૌ દંગ થઈ જશે,
આંસુના જળમાં ખુદને ઝબોળી રહ્યો છું હું.
.
તાસીર એની કે’શે એ અમૃત કે ઝેર છે,
જાણું છું એટલું કશું ઘોળી રહ્યો છું હું.
.
આ સ્વપ્નવત જીવનમાં કશું બીજું ના થયું,
બાળકની જેમ આંખને ચોળી રહ્યો છું હું.
.
( ‘રાઝ’ નવસારવી )
હજુ ય શોધ ચાલુ છે? કે…
હજુ ય શોધ ચાલુ છે? કે…