.
ઝાડ પરથી પાનનું ખરવાપણું કહેતું હતું કે ક્ષણ ગઈ છે આથમી છોડો મમત;
હું પણાનું આખરે ઠરવાપણું કહેતું હતું કે ક્ષણ ગઈ છે આથમી છોડો મમત.
.
શું મળ્યું છે ખાલી ઘર ફંફોસતા ? ભીંતે મઢેલો ખાલીપો કે એ જ પાછી શૂન્યતા ?
સાંપડેલું એક બસ ડરવાપણું કહેતું હતું કે ક્ષણ ગઈ છે આથમી છોડો મમત.
.
આમ જુઓ તો હયાતી આખરે એક શ્વાસનો ફુગ્ગો જ છે, એથી વધારે કૈં નથી;
જ્યાં જુઓ ત્યાં શ્વાસનું ભરવાપણું કહેતું હતું કે ક્ષણ ગઈ છે આથમી છોડો મમત.
.
છો રહી કૈં આજ તારી બોલબાલા ચોતરફ, એ આજ નહિ તો કાલ ઓછી થૈ જશે;
કાળના કો’ ચક્રનું ફરવાપણું કહેતું હતું કે ક્ષણ ગઈ છે આથમી છોડો મમત.
.
ઝાંઝવાનું જળ થયે વર્ષો થયા, બદલો અમારી હસ્તરેખાના વળાંકો આજ કૈં;
ક્યારનું એ જળતણું તરવાપણું કહેતું હતું કે ક્ષણ ગઈ છે આથમી છોડો મમત.
.
( જિતેન્દ્ર પ્રજાપતિ )
જીવનની વાસ્તવિકતા નું ખૂબજ સુંદર રીતે રચના દ્વારા આલોકન કરેલ છે અને મમત જે જીવનમાં મારું, તારું વિગેરેની છે તે માટે સુંદર ચેતવણી આપેલ છે… સુંદર રચના !
જીવનની વાસ્તવિકતા નું ખૂબજ સુંદર રીતે રચના દ્વારા આલોકન કરેલ છે અને મમત જે જીવનમાં મારું, તારું વિગેરેની છે તે માટે સુંદર ચેતવણી આપેલ છે… સુંદર રચના !
છોડો મમત…
છોડો મમત…