.
સુગરી કપોત તેતર ચકલાંને આવવા દે
પર્યાય છે પરમના ટહુકાને આવવા દે
.
પહેલાં તો સ્તંભ પર તું દેખાડ એક કીડી
મોકલ પછી-નિરાંતે ભડકાને આવવા દે
.
ખાબોચિયું બનીને ખુદ પૂરતું ના વિચારીશ
ભીતર પ્રસાર પહોળું, દરિયાને આવવા દે
.
આક્ષેપ હોય તો છે રક્ષણ જરૂરી તારું
જો હોય એ કસોટી-પથરાને આવવા દે
.
અંધારું એવું, કાંઈ ભાળી નથી શકાતું
પકડી શકું, દિશા હું, પડઘાને આવવા દે
.
આવે તું સામે ત્યારે ભાષા દગો જો આપે
કિંતુ-પરંતુ-જોકે-અથવાને આવવા દે
.
અવરોધ સૌ વટાવી સૂરજને ઝીલવો છે
વચ્ચેથી દૂર થા તું, તડકાને આવવા દે
.
( શોભિત દેસાઈ )