હરિ, મન ઝંખે ગોરજટાણું;
ગાયોની ઘંટડીઓ સાથે મોકલશો ને આણું ? હરિ.
.
સૂર્ય ઢળે તો થાય તમારા અસલ તેજની ઝાંખી;
જૂઠા ઝબકારા સામે મેં આંખ ઉઘાડી રાખી;
બળબળતી બપોરનું મારે શું લેવું ઉપરાણું ?
હરિ, મન ઝંખે ગોરજટાણું…
.
શિંગડીઓના ઉજાસમાં રજકણને આછી ડમરી;
ખરીઓના ભણકારામાં હું તમને લઉં છું સમરી;
ઘરને ખૂણે ધૂંધવાય છે ધીમું છેલ્લું છાણું;
હરિ, મન ઝંખે ગોરજટાણું…
.
( ભગવતીકુમાર શર્મા )
હરિ, મને ઝંખે ગોરજટાણું … ખૂબજ સુંદર !
હરિ, મને ઝંખે ગોરજટાણું … ખૂબજ સુંદર !