લંબાવું હાથ, તોય અડકી શકાય નહીં,
ભડભડતી આગ – તોય સળગી જવાય નહીં,
તારો ને મારો આ કેવો સંબંધ
જેમાં સામસામે બેસીને સામે જોવાય નહીં ?
.
આંખોમાં ઊછળતા ખારાં પાણીનો
હવે ખળખળતો – ધસમસતો ધોધ
તારી છાતી પર મારી અટવાતી નજરોમાં
નકરા આધારની શોધ.
.
અડધી રાતે મારી આંખો ખૂલે
ને, ભૂલે સ્વપ્નાંઓ ઈચ્છાની ભાષા,
ભૂરી, ઉફણતી ને ધગધગતી રાતમાં
તુંય હોય જાગતો, એ આશા !
.
હોય તું – તોય, તારા હોવાની સાબિતી
માગ્યા કરે મારી જાત.
પડખામાં હોઉં ત્યારે ઊગે છે રાત,
ને તું જાય ત્યારે આથમે પ્રભાત.
.
સળગતી જાતને, ભડકે બાળીને
મારે કરવું અજવાળું તારા ઓરડે…
સંબંધો બાંધવા કંઈ સહેલા નથી,
વડ વીંટ્યા વીંટાય નહીં દોરડે.
.
એકાંત મારી આંખમાં, ને ખાલીપો કાંખમાં
તોય તારા હોવાનો ભાસ
પડખામાં તારા – કોઈ નિરાંતે ઊંઘતું
મારી મુઠ્ઠીમાં મારો નિ:શ્વાસ.
.
( કાજલ ઓઝા વૈદ્ય )
Good one
Good one
Good one