આથમતા સૂરજના અજવાળામાં આવો,
વૃક્ષ કહે છે પંખીને, માળામાં આવો.
.
પાંગરવા દો આજ વસંતોને મારામાં,
તમને ગમતી મૌસમના ગાળામાં આવો !
.
મારા તો વૈશાખ અને ચૈતર સોનેરી,
ભરબપ્પોરે પીળા ગરમાળામાં આવો.
.
કટકે કટકે ક્યાં લગ કરવી કથા આપણી ?
ઘટના થઈને સાજણ સરવાળામાં આવો.
.
ઇન્દ્રધનુષી રંગો પથરાશે દરિયામાં,
શ્વેત સ્વપ્ન સંગાથે પરવાળામાં આવો.
.
જનમ-મરણના ફેરાઓથી કંટાળ્યો છું;
મુક્તિ દેવા મારા કુંડાળામાં આવો !
.
( ‘વિવશ’ પરમાર )