શોધી જો શકો, શોધજો, ખોવાઈ ગયો છું;
અંધારામાં હું જાતથી અથડાઈ ગયો છું.
.
સામેથી મને આવતો જોઈ હું હસ્યો’તો,
કિન્તુ એ ગલીથી પછી ફંટાઈ ગયો છું.
.
આવ્યો’તો આ દુનિયામાં લઈ લાગણી અઢળક;
અડધી જ સફરમાં ઘણો ખર્ચાઈ ગયો છું.
.
થાવું જો પ્રગટ હોય તો આ છેલ્લી ઘડી છે;
ક્ષમતાથી વધારે હું વલોવાઈ ગયો છું.
.
મધ્યાહ્નના સૂરજનો કશો ડર નથી મનમાં;
હું ચાંદની રાતોમાંયે અંજાઈ ગયો છું.
.
મૃત્યુના ફરિશ્તાની જરૂરત ન કશી છે;
જઈ એને કહો કે હું સમેટાઈ ગયો છું.
.
ઈચ્છો તો મને વચ્ચેથી ફાડી યે શકો છો;
કાગળ છું, ઘણી વાર વંચાઈ ગયો છું.
.
( ભગવતીકુમાર શર્મા )
ખૂબજ સુંદર રચના ! ધન્યવાદ !
ખૂબજ સુંદર રચના ! ધન્યવાદ !