બધા જ રસ્તા પૂરા થાય એ પછી હું છું,
કશું જ ક્યાંય ના દેખાય એ પછી હું છું.
.
બધા જ ગ્રંથ અને સમજણો અધૂરા છે,
જરાક આટલું સમજાય એ પછી હું છું.
.
બધા જ અક્ષરો… ઉચ્ચાર – અર્થમાં સરખા,
બધું જ મૌનમાં બોલાય એ પછી હું છું.
.
નજરમાં જાય સમેટાઈ બધું ઈચ્છા થઈ,
નજરમાં કૈં જ ના સમાય એ પછી હું છું.
.
બધી જ સીમા બધા અંત તો ઈશારા છે,
લખાણ બ્હારનું વંચાય એ પછી હું છું.
.
બધું જ જોઈ શકે તું થતું અહીં મિસ્કીન,
અને અજાણ્યો બની જાય એ પછી હું છું.
.
( રાજેશ વ્યાસ ‘મિસ્કીન )