(૧)
સ્પર્શ,
અણુએ અણુમાં વ્યાપી જતી,
પૂરા પામી જવાની
પ્રવાહી ઘટનાનું નામ સ્પર્શ !
એકત્વની આરાધનાનું પ્રથમચરણ
અને પૂર્ણ અદ્વૈતનું મૌન શિખર
એ જ સ્પર્શ.
પૂર્ણ સ્પંદને નિ:સ્પંદીત ચેતના
એ જ સ્પર્શ પ્રકાશ !
.
તું જ્ઞાન, અંધકાર અમે !
.
(૨)
ક્ષણ,
સમયનું પરમસત્ય
એ જ ક્ષણ.
‘હતું’ અને ‘હશે’ની વચ્ચે
‘હોવું’ની વાસ્તવિકતા
એ જ સત્યક્ષણ.
અખિલાઈએ ક્ષણની ઓળખ,
ક્ષણનું અનુસંધાન અને
ક્ષણનો આનંદ
એ જ ક્ષણ સાક્ષાત્કાર !
.
તું અનંત, અંત અમે !
.
( ડો. ભરતભાઈ મિસ્ત્રી )