પ્રેમમાં પડેલો સૂર્યવંશી, ચંદ્રવંશી થઈ જાય છે !
.
પ્રેમમાં ગણિત આવે છે ત્યારે પ્રેમી મહેતાજી થઈ જાય છે !
.
શણગાર ઉતાર્યા વિના રાજારાણી પ્રેમ ન કરી શકે !
.
રઘવાયો પ્રેમ લાગે, સંયમ યમ જેવો લાગે !
.
પ્રેમ પૂજા કરવા માંડે ત્યારે તે કર્મકાંડી થઈ જાય છે.
.
કોઈ જુદાં પડવા માટે મળે છે, કોઈ ફરી મળવા માટે જુદાં પડે છે !
.
પ્રેમ એવો સોનામહોર સિક્કો છે, જેની પરની મુદ્રા બદલી શકાતી નથી.
.
‘પ્રેમ’ પુરુષજાતિનો શબ્દ હોવાથી તે અર્ધસત્ય છે !
.
પ્રેમ, શૂન્યમાંથી સર્જન કરે છે, તેમ પોલા શૂન્ય વચ્ચેની હવા પણ કાઢી નાખે છે !
.
પ્રેમનું ગુરુત્વાકર્ષણ ધરતી પર આણીને આકાશે લઈ જાય છે !
.
પ્રેમ આષાઢી મેઘની જેમ ઘેરાય છે ત્યારે અનરાધાર વરસે પણ છે !
.
પ્રેમ પેઈંગ ગેસ્ટ હોવાથી એનું સરનામું કેર ઓફ જ હોય !
.
સંવનન તો મધપુડો રચવાની પ્રક્રિયા હોય છે !
.
પ્રેમના દરિયામાં પણ ચાંચિયાનાં વહાણ ફરતાં હોય છે !
.
પ્રેમને કાળીચૌદશ નહીં, ચૌદશિયા નડે !
.
કોઈ પ્રેમનું મંદિર બાંધતું નથી, કેમ કે મંદિર ‘સાર્વજનિક’ હોય છે !
.
પ્રેમ ઊર્જા હોવાથી પ્રેમીઓ હૂંફાળા હોય છે !
.
પ્રેમ આખું ગીત ગાતો નથી, માત્ર ધ્રુવપંક્તિ દોહરાવ્યા કરે છે : ‘હું તને ચાહું છું !’
.
પ્રેમ : અગિયાર અગિયાર અમાસ પછી દિવાળી આવે છે !
.
પ્રેમ એટલે સાથીની શોધમાં આગળ જતી એકલની પગદંડી !
.
( રતિલાલ ‘અનિલ’ )