અમે આંસુ છીએ, ચાહો અગર તો બસ વહાવી દો;
નહીંતર ચૂપ રહેશું જિંદગીભર જો છુપાવી દો !
.
હયાતી છે અમારી તણખલા જેવી જ હળવીફૂલ,
તમે માળો સજાવો કે હવામાં એ ઉડાવી દો !
.
અમે સૂરજ નથી કે જીદ પર આવી સળગશું રોજ,
અમે તો કોડિયાં, ચાહે જલાવો કે બુઝાવી દો !
.
અમે અંબર નથી કે આંબવામાં પણ પડે ફાંફા,
અમે ધરતીનાં છોરું, હાથ દૈ હૈયે લગાવી દો !
.
અમે વિચાર પણ ક્યાં કોઈ ભારેખમ છીએ ‘સુધીર’?
જરા હળવું કરી કૈં સ્મિત ચહેરા પર સજાવી દો !
.
( સુધીર પટેલ )