બની હરણાં ઉછળતાં’તા કદી સ્વપ્નો હથેળીમાં,
વહાલાં થઈ વળગતાં’તા કદી સ્વપ્નો હથેળીમાં.
.
થયાં છે કેદ એ સંજોગની મુઠ્ઠી મહીં મિત્રો,
સિફતથી જે સરકતાં’તા કદી સ્વપ્નો હથેળીમાં.
.
હવે ઓકી રહ્યા છે લૂ નજર સામે બની તડકો,
થઈ શ્રાવણ વરસતાં’તા કદી સ્વપ્નો હથેળીમાં.
.
નજરમાંથી ઉતારે જે ક્ષણે એને જરા કોઈ,
બની આંસુ ટપકતાં’તા કદી સ્વપ્નો હથેળીમાં.
.
બચી છે રાખ બસ એની સળગતી યાદની વચ્ચે,
બની રત્નો ચળકતાં’તા કદી સ્વપ્નો હથેળીમાં.
.
( જિજ્ઞા ત્રિવેદી )