ભીંત ફાડીને ઉગેલા પીપળાની જેમ,
આપણને જીવવાનું ફાવે છે એમ.
.
એંધાણી આપતા પગલાંઓ ભૂંસીને
નવલા હું પગલાં કંડારુ.
જાણીતા મારગને ચાતરીને ચાલુ જ્યાં
દિવસે પણ ભેટે અંધારુ.
વગડાની ધૂળ મને ચૂમે ને પૂછે-મને ભૂલે છે કેમ ?
આપણને જીવવાનું ફાવે છે એમ.
.
ફાડીને આભ ભલે વરસે વરસાદ
મને ધરતી ભીંજાય તો જ ગમશે.
પાણી તો પથ્થરનાં ફોડી પાતાળને
ઝરણું થઈ આસપાસ રમશે.
.
હું તો મારામાં, નવ્વો નક્કોર હેમખેમ,
આપણને જીવવાનું ફાવે છે એમ.
.
( પરાજિત ડાભી )