કળીની સુરખિ-શો મત્લઆ પતંગિયા કહેશે
કુમાશ તારી, ને મિસરા પતંગિયા કહેશે !
.
ઘુઘવતી માટી લગ રસ્તા પતંગિયા કહેશે !
ફૂટે ક્યાં ખુશ્બુનાં ઝરણાં, પતંગિયા કહેશે !
.
કવિ ! બગીચા સાથે તારે વાત કરવી છે !
તો શીખ ફૂલની ભાષા, પતંગિયા કહેશે !
.
નદીમાં છે તે થનગનાટ છે પવનમાં પણ
લઈને પાંખમાં ગાણાં, પતંગિયા કહેશે !
.
ભરી સભા હશે…ઋતુઓ ને બાગ સુણતાં હશે
ખરેલાં પર્ણની ગાથા પતંગિયા કહેશે !
.
“પદાર્થ પામવો જો હોય તારે મર્મરનો-
-લખ્યાં છે તૃણ ઉપર કક્કા”, પતંગિયા કહેશે !
.
જઈશ ત્યારે હિસ્સો રેશમી દઈને જઈશ
ભલે ક્ષણિક છે આ કાયા, પતંગિયા કહેશે !
.
( લલિત ત્રિવેદી )