નીચા દરવાજાની મજબૂરી નિભાવી લઈએ,
એવું ઘર હો તો જરા માથું નમાવી લઈએ.
.
પાંદડાં તૂટે ને કરગરવું પડે તે કરતાં,
ચાલ રિસાયેલી મોસમને મનાવી લઈએ.
.
ક્યાંક આંખોથી, ગઝલથી કે મુસ્કુરાહટથી,
કોઈ પણ રીતે અમે કામો કઢાવી લઈએ.
.
એક આંસુનું વજન ટેરવું ઝીલે તો પછી,
આપણે ખોબામાં પરવતને ઉઠાવી લઈએ.
.
ભાગ્યરેખાની જરા ઊંઘ ઊડે તે માટે,
એનું સરનામું હથેળીમાં લખાવી લઈએ.
.
પાનખર ઘરમાં કદાચ આવી ચડે તે પહેલાં,
ફૂલદાનીને ઝરૂખેથી હટાવી લઈએ.
.
છો ખલીલ આજે નજર ફંફોસે ચેહરા સૌના,
આજ આ થાકેલી આંખોને તપાવી લઈએ.
.
( ખલીલ ધનતેજવી )