રાતો ગજવામાં મૂકે છે, બીડીમાં દિવસો ફૂંકે છે
ક્યાં કાન ધરે કોઈ શું કે’ છે, બીડીમાં દિવસો ફૂંકે છે
.
બધ્ધા ઉપર તાડૂકે છે, નજરુંનું અમરત ડૂકે છે
સમજણની ગાય વસૂકે છે, બીડીમાં દિવસો ફૂંકે છે
.
કોઈ માટે સન્માન નથી, શું બોલે છે-કૈં ભાન નથી
કડવીવખ વાણી થૂંકે છે, બીડીમાં દિવસો ફૂંકે છે
.
સ્મરણોનાં વાદળ વીખરાયાં, એકલતાના બસ પડછાયા
કોઈ ક્યાં પાસે ઢૂંકે છે, બીડીમાં દિવસો ફૂંકે છે
.
ફૂલોનો આસવ અધરો પર-ને વાત હવે પાછી ના કર
સોડમ પીવાનું ચૂકે છે, બીડીમાં દિવસો ફૂંકે છે
.
ત્યાંથી નીચે બસ ખાઈ હશે-એ વાત નહીં સમજાઈ હશે
ઘનઘોર નશાની ટૂંકે છે, બીડીમાં દિવસો ફૂંકે છે
.
ભીતરનું જંતર રણઝણતું, એ જાય હવે તો આથમતું
ભંડાર ભર્યા સંદૂકે છે… બીડીમાં દિવસો ફૂંકે છે
.
( નીરજ મહેતા )