તારે કાંઠે કિલ્લા સર્જે એક મજાનું બાળ સમંદર
અરજ આટલી માન બને તો આગળ વધવું ટાળ સમંદર
.
એક માછલી તરતાં બચતાં છેવટ સમજી મર્મ કથાનો
માછીમારથી શું ડરવાનું સૌથી મોટી જાળ સમંદર
.
હું કોશિશનું તરણું પકડી કાંઠાઓની આશમાં તડપું
ક્યાં છોડે છે આ કચ્ચીને વળગેલો પ્રેમાળ સમંદર
.
હું ઊંડા બેચાર શ્વાસ લઈ તળિયાઓની શોધમાં નીકળું
નફ્ફટ થઈ ને ઊંડે ઊંડે ચણતો જાતો માળ સમંદર
.
થાક્યા પગના વલોપાતને સ્પર્શી પાછો કેમ પડે છે
માનવમહેરામણ છે મંથન રોજિંદી ઘટમાળ સમંદર
.
( સૌમ્ય જોશી )