વિક્ષિપ્ત કેવું મન છે, દોડે છે દડા પાછળ,
બેહોશ સાવ તન છે, દોડે છે દડા પાછળ.
.
છે ખુદ અનંતચેતન પણ સ્વાદજડનો લેવા,
તારાઓ રત ગગન છે, દોડે છે દડા પાછળ.
.
નિંદરના પટ ઉપરનું પોતે તો ઝાંઝવું છે,
અણસમજુ આ સપન છે, દોડે છે દડા પાછળ.
.
પર્ણો ફરકતા છોડી પુષ્પોની મ્હેક ત્યાગી,
રણ ઘેલો શું પવન છે, દોડે છે દડા પાછળ.
.
જાણે છે બોલ હમણા હદને વળોટી જાશે,
ખેલાડી કેવો જન છે, દોડે છે દડા પાછળ.
.
અજ્ઞાત એ પરમના મહિમાનું ગાન છોડી,
કવિઓનાં શું કવન છે, દોડે છે દડા પાછળ.
.
( હરકિસન જોષી )