(૧)
રણ ફેલાતું ફેલાતું
ફળિયા સુધી આવી ગયું
ને તું
હજી તુલસી ક્યારો
સીંચે છે ?!
.
(૨)
ચરોતર,
હું તારી છાતી પર
ઊગેલો
તમાકુનો કોઈ છોડ તો નથીને ?!
.
(૩)
આમ તો
ખુલ્લા હશે
ને આમ મીંચાઈ જશે,
ચક્ષુ એનાં એ હશે
ને સ્વપ્ન બદલાઈ જશે !
.
(૪)
આભ ઊંચી
જૂની મહલ હવેલીમાં
અમાસ અને પૂનમ
સાથે જ
રહે છે !
.
(૫)
અમાસની ઉદર-ત્વચાનો
ભીનોભીનો ઝળહળાટ
મેં આકંઠ પીધો છે !
.
(૬)
પૂનમ અને અમાસ
ક્યારેક સાથે
ફરવા નીકળે છે ને
રસ્તો
શ્વેત-શ્યામ વસ્ત્રો
પહેરી લે છે !
.
(૭)
ફુલ્લ સ્પિડથી
મોટરસાયકલ
ચલાવી રહ્યો છે અંધકાર
અને એની પાછળ બેસીને
પૂનમ ફરવા નીકળીછે !
.
(૮)
વતનના ગામમાં
વેચી નાખેલું મારું મકાન
એક રાત્રે
સ્વપ્નમાં આવ્યું.
મેં પૂછ્યું ‘કેમ છે ?’
તો કહે : ‘એ તો ખબર નથી,
પણ આપણી પાછળનું
પેલું માથાભારે ખંડેર
હવે મહેલ થઈ ગયું છે !’
.
( કરસનદાસ લુહાર )