એના હાથોમાં જે સરનામું છે,
એ ઠેકાણું તો મારા ઘરનું છે !
એક સુરાલય છે આપણું મિત્રો,
બાકી આખું જગત તો એનું છે !
તારે શું કહેવું છે હું જાણું છું,
તને મારે પણ એ જ કહેવું છે !
એનું મળવું ન મળવા જેવું હતું,
એનું જોવુંય જોવા જેવું છે !
પહેલા આ વાતનો ખુલાસો કર,
તારે દિલ દેવું છે કે લેવું છે ?
એ ખુદા છે તો એના ઘરનો હશે,
એને ક્યાં મારા ઘરમાં રહેવું છે !
તું સહજ મનની આંખ ખોલ ને જો,
તારી સામે જ કોઈ બેઠું છે !
આ ગઝલ તો તમારી છે, ‘ઓ અદી’
એમાં જે દર્દ છે એ કોનું છે ?
( અદી મિર્ઝા )