મારા માથે આકાશ છે, પણ…-ચંદ્રકાંત શેઠ

મારા માથે આકાશ છે, પણ મારું આકાશ ક્યાં છે ?
સૌના મુખે ભાષા છે, પણ મારી ભાષા ક્યાં છે ?
મને શોધ છે-
મારા નામે અંકિત થાય એવા સર્જનાત્મક સમયની;
મને શોધ છે-
મારા કામને કોળાવી દે તેવા વિસ્મયની;
મારી પાસે પગલાં છે,
પણ એના માટે જાગતો-ઝૂરતો રસ્તો ક્યાં છે ?
મારો પંડનો પડછાયો છે,
પણ એની ખબર લે એવો ઓલિયો-ફિરસ્તો ક્યાં છે ?
મને શોધ છે-
મારા અવકાશને કલ્લોલાવે એવા કલરવની;
મને શોધ છે-
મને પંખાળો કરે એવા પવનના પનોતા પદરવની;
મારી પાસે દરિયો છે,
પણ તળિયાના તેજના મનમોજી મરજીવા ક્યાં છે ?
મારી પાસે દુનિયા છે,
પણ દૈવતના દેશના અમિયલ દ્રષ્ટિના દીવા ક્યાં છે ?

( ચંદ્રકાંત શેઠ )

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.