ઘર-પ્રીતમ લખલાણી

૧.
બાળકો
મજેથી કોઈ ખૂણે
ઘર ઘર રમતાં હોય છે,
તે ક્ષણે
ઘરનું સાચું સુખ
આપણી આસપાસમાં
ઊઘડતું હોય છે !

૨.
વાત જો ફક્ત
બંગલો જ બાંધવાની
હોય તો
રોજ બાંધી શકીએ,
પણ એક ઘર બનાવતાં
તો
કદાચ આખું આયખું
વીતી જાય !

૩.
‘ભલે પધાર્યા’નું
તોરણ નહીં
પણ ઉંબરાનું વાતાવરણ
તમને આવકારવા
ઓતપ્રોત થઈ જતું દેખાય તો
સમજજો હોટલ નહીં પણ
તમે મનગમતા ઘરે
થયા છો મહેમાન !

૪.
કોઈ ઢળતી સાંજે
કિલકિલાટ કરતાં પંખીના
એકાદ માળે જઈ ચઢશો તો
સમજાઈ જશે કે
ભલા ઘર શું છે ?

( પ્રીતમ લખલાણી )

Share this

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.