આંખનો વધશે હજી ખખડાટ, આ તો કૈં નથી

ખૂબ મચવાનો પછી તરખાટ, આ તો કૈં નથી

તારું ચોમાસું રિસાયે ક્યાં લાંબો થયો !

તેં નથી જોયો અસલ ઉકળાટ, આ તો કૈં નથી

તેજના વધવાની લાલચને હજી પણ રોકી લો

લાવશે અંધાપો, એ ચળકાટ, આ તો કૈં નથી

હું જો પટકાઉં  શિખરથી તો દિલાસા તું ન દે

આભ પરથી ખાધી છે પછડાટ, આ તો કૈં નથી

આ સજા પડવાની ધ્રુજારી છે, પસ્તાવાની નહિ

તમને સમજાશે પછી ગભરાટ, આ તો કૈં નથી

કદરૂપા સર્જનની ફરિયાદોથી છંછેડો નહીં

દાઝમાં ઘડશે નવો એ ઘાટ, આ તો કૈં નથી

( ભાવેશ ભટ્ટ )