શેઢે બેઠો છે કિરતાલ.
મારી સાથે મહેનત કરતો, જાણે ભાગીદાર.
શેઢે બેઠો છે કિરતાલ.
.
હું ખેતર ખેડું, તે માથે મેઘ થઈને વરસે.
મેં વાવેલા દાણે દાણે હેત હૂંફાળું સ્પર્શે.
ક્યારે ક્યારે લીલાપ થઈ છલકાતો પારાવાર.
શેઢે બેઠો છે કિરતાલ.
.
નીંદામણ હું કરી, ચાડિયો થઈ, રખોપું કરતો.
ડૂંડે સાચાં મોતીનું તે ભરત રૂપાળું ભરતો.
છૂપો રહીને તે ચીવટથી કરતો કારોબાર.
શેઢે બેઠો છે કિરતાલ.
.
મારી મહેનત થઈ ફોતરાં પવન મહીં ફેંકાતી.
અને ખળામાં તેની વ્હાલપ ઢગલો થઈ ઠલવાતી.
ભાગ ન માગે ને યશ આપે આ કેવો વહેવાર ?
શેઢે બેઠો છે કિરતાલ.
.
( કિશોર બારોટ )