Archives

તમારી નજરમાં – ચિનુ મોદી

ઘણાં કારણોસર પીડાયો છું હું

તમારી નજરમાં પરાયો છું હું.

 .

અરીસા બધા એકસરખા નથી;

ફક્ત એક-બેમાં જણાયો છું હું.

 .

બિછાવી હતી જાળ જળમાં તમે

ગગનગામી છું, પણ, ફસાયો છું હું.

 .

બધાં પુષ્પ જ્યારે સુગંધિત થયાં

વસીને બગીચે, દબાયો છું હું.

 .

ફરે ચાકડો આપમેળે અને

રમતવાતમાં આ રચાયો છું હું.

 .

જનમ જેમ વ્હાલા મરણ ! જાણ તું

સ્વજના છું, સગો છું, માડી જાયો છું હું.

 .

નથી યાદ ‘ઈર્શાદ’ કરવું કશું

બરફ પણ અડે તો દઝાયોછું હું.

 .

( ચિનુ મોદી )

આધુનિક લોકગીત – સુરેશ દલાલ

.

જન્મ્યા છો તો ભલે જનમિયા : મૂગા મરજો

દુનિયાદારીની છે દુનિયા : મૂગા મરજો

.

કાગળ કેરાં ફૂલ ફળે અહીં : મૂગા મરજો

ચેકબુકના દીવા બળે અહીં : મૂગા મરજો

 .

કાગળ આખો, માણસ ડૂચા : મૂગા મરજો

અહીં નહીં રુચિ કે ઋચા : મૂગા મરજો

 .

ઈંટ અને પથ્થરનો માણસ : મૂગા મરજો

ટ્યુબલાઈટમાં સૂરજ ફાનસ : મૂગા મરજો

 .

પ્રેમબેમનું નામ અહીં નહીં : મૂગા મરજો

કામ, કામ, ને કામ રહ્યાં અહીં : મૂગા મરજો

 .

( સુરેશ દલાલ )

Protected: Happy Birthday!

This content is password protected. To view it please enter your password below:

This entry was posted on May 23, 2012, in Uncategorized. Enter your password to view comments.

ડૂબવામાં પણ મઝા – હરીશ પંડ્યા

ઓ કિનારે બેસનારાં, ડૂબવામાં પણ મઝા છે,

હાથ આવી જાય મોતી, લૂંટવામાં પણ મઝા છે.

 .

રાત આખી તેં પ્રતીક્ષા આમ બેસીને કરી છે,

ને સવારે એ જ બારી, ખૂલવામાં પણ મઝા છે.

 .

હોય માળી બાગમાં એથી કહોને શું થયું રે,

ફૂલ સુંદર એક છાનું ચૂંટવામાં પણ મઝા છે.

 .

જામ લેતાં હાથ ધ્રૂજ્યો ને ઢળી મદિરા જરી તો,

ઘૂંટ કેવળ પી શક્યો બે, ખૂટવામાં પણ મઝા છે.

 .

વાટમાં તોફાન સાગમટે ફળે-ની શક્યતા પણ,

જિંદગી દાવે લગાવી, ઝૂઝવામાં પણ મઝા છે.

 .

( હરીશ પંડ્યા )