Tag Archive | ગુજરાતી કવિતા

આ તો કૈં નથી-ભાવેશ ભટ્ટ

આંખનો વધશે હજી ખખડાટ, આ તો કૈં નથી

ખૂબ મચવાનો પછી તરખાટ, આ તો કૈં નથી

તારું ચોમાસું રિસાયે ક્યાં લાંબો થયો !

તેં નથી જોયો અસલ ઉકળાટ, આ તો કૈં નથી

તેજના વધવાની લાલચને હજી પણ રોકી લો

લાવશે અંધાપો, એ ચળકાટ, આ તો કૈં નથી

હું જો પટકાઉં  શિખરથી તો દિલાસા તું ન દે

આભ પરથી ખાધી છે પછડાટ, આ તો કૈં નથી

આ સજા પડવાની ધ્રુજારી છે, પસ્તાવાની નહિ

તમને સમજાશે પછી ગભરાટ, આ તો કૈં નથી

કદરૂપા સર્જનની ફરિયાદોથી છંછેડો નહીં

દાઝમાં ઘડશે નવો એ ઘાટ, આ તો કૈં નથી

( ભાવેશ ભટ્ટ )

નહોતી કરી-કિરણસિંહ ચૌહાણ

મેં પ્રભુની કોઈ ભક્તિ-સરભરા નહોતી કરી,

તોય એ ખુશ…કેમ કે મેં યાચના નહોતી કરી.

એક પણ વ્યક્તિના હોઠે સ્મિત ના લાવી શક્યો,

આટલા નિષ્ફળ દિવસની કલ્પના નહોતી કરી.

આપણે બદલો તો લેવો જોઈએ પણ આ રીતે ?

તેં કરી એવી તો એણે અવદશા નહોતી કરી !

આ વખત નિર્દોષ છું હું તોય અપરાધી ઠર્યો,

જ્યારે મેં ગુન્હો કર્યો’તો, તેં સજા નહોતી કરી.

મૂંઝવણ ઈશ્વરની છે કે ‘કેવું જીવન દઉં તને ?’

તેં મજાની જિંદગીમાં પણ મજા નહોતી કરી.

( કિરણસિંહ ચૌહાણ )

પરવાનગી દે-ખલીલ ધનતેજવી

તને તારી પાસેથી માગું હું એવી દુવા માગવાની તું પરવાનગી દે,

તને દોસ્તી મારી મંજૂર છે તો તને ચાહવાની તું પરવાનગી દે !

હું દરિયાની લહેરોની માફક નથી કે કિનારાને સ્પર્શીને પાછો વળી જાઉં,

હું આંખોના ઉંબર લગોલગ ઊભો છું હૃદય લગ જવાની તું પરવાનગી દે !

તું મક્તા વગરની કુંવારી ગઝલ છે, તું શીર્ષક વિનાની નવી વાર્તા છે,

હવે બસ તમન્ના તને વાંચવી છે, તને વાંચવાની તું પરવાનગી દે !

બધા અક્ષરો તારી બારાખડીના, હવે મારે મોઢે કરી લેવા પડશે,

કે કક્કાની માફક તને ઘૂંટવી છે, તને ઘૂંટવાની તું પરવાનગી દે !

ભલે તું અછાંદાસ છે તો પણ તું જોજે, તરન્નુમ પ્રગટશે તારા હોઠમાંથી,

ગઝલ જેમ મારે તને છેડવી છે, તને છેડવાની તું પરવાનગી દે !

કદી કલ્પનામાં કદી રૂબરૂમાં કે મધરાતે સ્વપનામાં હું છું રે કોઈ,

ઘણા પ્રશ્નો મારે તને પૂછવા છે, તને પૂછવાની તું પરવાનગી દે !

ખલીલ એ હવે ક્યાંક છટકે ન માટે સરસ પ્રેમપૂર્વક કહી દો કે સાંભળ,

વચન વાયદામાં તને બાંધવી છે, તને બાંધવાની તું પરવાનગી દે !

( ખલીલ ધનતેજવી )

સ્મરવાનું રાખો-રઘુવીર ચૌધરી

જીવતાં જીવતાં એક ઘડી કે આધ ઘડી મરવાનું રાખો,

રાગરંગની સગવડ વચ્ચે અંતરતમ ફરવાનું રાખો.

ભૂતકાળના હિસાબ છેકી, ભવિષ્યની ગણનાઓ રોકી,

વર્તમાનની અવાક પળમાં જાત ભૂલી ભળવાનું રાખો.

ક્યાંક સમયનું પૂર આવશે, વા વાશે વંટોળ લાવશે,

રૂપસાગરે મોજાંની મધ્ય વમળ તરવાનું રાખો.

આ પૂરવ આ પશ્ચિમ ઉત્તર દેશદેશની દુનિયા નોખી,

હદ અનહદની સરહદ ભૂલી દૂર નજર કરવાનું રાખો.

સત્ય નથી ને પ્રેમ નથી એ માનીને કરુણા નહિ પામો,

હું તું ને તે ત્રણ અક્ષરમાં ઈશ્વરને સ્મરવાનું રાખો.

( રઘુવીર ચૌધરી ) 

( રઘુવીર ચૌધરી ) 

મૈત્રી-ગુણવંત શાહ

એક સાચકલા મૈત્રીસંબંધની

ઝંખના વગરનો આદમી

જડવો મુશ્કેલ છે. માણસનો

તરસધર્મ અંતે હૃદયધર્મ બનીને

સાર્થક થાય છે.

આપણને આપણાં હિતમાં એકાદ

કડવી વાત પણ ન કહી શકે

એવો મિત્ર શા કામનો ?

આપણે બધી રીતે હારી જઈએ અને

ભાંગી પડીએ ત્યારે ઘણાંબધાં

સ્વજનોની કે સ્નેહીઓની

જરૂર નથી હોતી.

ઘોર નિરાશાની પળોમાં

આપણા બેવડ વળી ગયેલા

ખભા પર એક પ્રેમાળ સ્પર્શ,

કોઈ ન સાંભળે એમ

આપણને કહી દેતો હોય છે :

“અરે ! તારો આ દોસ્ત

મરી પરવાર્યો છે શું ? ચાલ,

નિરાશા ખંખેરી નાખ અને

કામે લાગી જા.

હું તારી પડખે છું.

સાથે ડૂબશું ને સાથે તરશું.’

આવો એકાદ મિત્ર હોય

તે માણસ

કદી ગરીબ ન હોઈ શકે.

( ગુણવંત શાહ ) 

Facebook પર શ્રીકૃષ્ણની પધરામણી-શ્રદ્ધા શ્રીધરાણી

“મારા Facebook પર શ્રીકૃષ્ણની પધરામણી”

 

વહેલી સવારે જોઈ મેં મારી Facebook Account ID,
તો ‘કૃષ્ણ યશોદાનંદ’ નામે Friendship Request આવી

Friendship Request આવી કૃષ્ણની! જોઈ હું તો હરખાઈ,
શું કરું? શું ન કરું? કહી મનમાં હું મલકાઈ

Accept કર્યા વધાવ્યા કાનને તુરંત લખ્યું Welcome,
ઊઘડ્યા અહો! ભાગ્ય મારા, તમે! અહીં મનમોહન!

વાહ! તમારો profile pic ને અહો! Cover photo!,
પીળું પીતાંબર, મુખે વાંસળી, મોરપિચ્છ મુગટ મોટો!

ત્યાં તો સળવળ થઈ messengerમાં online થયા ગિરિધારી!,
Send કર્યું મનમોહક smiley, હું તો ગઇ તન, મન, ધન વારી

મેં Message કર્યો ‘જય શ્રીકૃષ્ણ’! એમણે પૂછ્યું ‘Hello! How are you!?’,
‘આશ્ચર્ય મને! તમે તો કૃષ્ણ! English ક્યાંથી આવડ્યું!?’

કહે કૃષ્ણ, ‘સૌ લોકો ભૂલ્યા ‘જય શ્રીકૃષ્ણ ‘ કહેવું,

શીખ્યો છું આ Facebookમાંથી જ ‘ Hello! how are you! કરવું!’

આ અમૂલ્ય તકનો લઇને લ્હાવો, મેં કહ્યું ‘Phone Number આપો’,
Whatsapp number આપી કહે, ‘તમે મને Missed call મારો!’

આશ્ચર્ય ઉપર આશ્ચર્ય સાથે હ્રદયે વધ્યા ધબકારા,
મારા મોહન સાથેની મુલાકાતનાં વાગી રહ્યા ભણકારા…..

 

( શ્રદ્ધા શ્રીધરાણી )

 

Image courtesy : Divya & Jay Soni

લાલાની ગઝલ-સ્નેહલ જોષી

*લાલાની ગઝલ – ૧*

 

ફૂલ  ઉપર છે  ઝાકળ લાલા,

જીવન તારું ઝળહળ લાલા !

 

મથુરાથી ગોકુળ લગ જાવા,

એક નદી થઈ ખળખળ લાલા.

 

બોલ,  તને  શું  વ્હાલું  લાગે ?

ગંગાજળ, જમનાજળ લાલા ?

 

સૂર  સાંભળી  વાંસલડીના,

ખુલે  ઉરની  સાંકળ  લાલા !

 

સૌને  કેવળ  પૂર્ણ  જણાયા,

સ્હેજ થયા જો ચંચળ લાલા.

 

એક સુદામો ત્યાં જ ઊભો છે,

તું નીકળ્યો બહુ આગળ લાલા.

 

હાથ  બળે  છે  નરસૈંયાનો,

લાવ  કવિતાનું  જળ  લાલા !

 

ભવ-ભવની આ પ્રીત્યું કહેવા,

લખવાનો  છે  કાગળ  લાલા.

 

 

*લાલાની ગઝલ – ૨*

 

તું  નટખટ ને નટવર લાલા,

નાચે  તા  થૈ  નાગર લાલા.

 

ફેર કશો પણ ક્યાં પડવાનો,

ગિરિધર કે બંસીધર લાલા !

 

તારી  લીલાઓ  લખવામાં,

ટાંચા  પડશે  અક્ષર  લાલા.

 

તું ધરતીના છે કણ – કણમાં,

શોધે  સૌ  તારું  ઘર  લાલા !

 

નામ  સુદામાનું  સાંભળતા,

પગ અટક્યા ના પળભર લાલા.

 

યુગ વીત્યાં ને  આવી આઠમ,

આવ્યાં રૂડાં અવસર લાલા !

 

રાધા – માધવ  ભેટ  થઈ  છે,

ક્યાં  છે  કોઈ  અંતર  લાલા !

 

મીરાં  કે’  પ્રભુ  એક  તરાપે,

તરવાનો  છે  સાગર  લાલા.

 

 

*લાલાની ગઝલ – ૩*

 

આંખોમાં છે  પાણી લાલા,

કેવી  તારી  વાણી  લાલા !

 

એ જ ન પામ્યાં દર્શન તારું,

દ્રષ્ટિ  જેની  કાણી  લાલા !

 

ક્યારેક આપ્યાં વસ્ત્રો અઢળક,

ક્યારેક  લીધાં  તાણી લાલા !

 

જીવનમાં  કે   રણમેદાને,

ફૂટે  જ્ઞાન – સરવાણી  લાલા !

 

આંખોના  એક જ  પલકારે,

લીધો  નાગને  નાણી  લાલા.

 

કર્યું   કારવ્યું   સૌનાં   માટે,

રહ્યા  ધૂળ ને  ધાણી  લાલા !

 

તું  જેનાં  મનમાં  વસવાનો,

એ  સૌ  તારી  રાણી  લાલા !

 

લીલાઓ  સંપૂર્ણ  કરી  તે,

અડધી ક્યાં સમજાણી લાલા.

 

 

*લાલાની ગઝલ – ૪*

 

કેશ  નર્યાં  વાંકડિયા  લાલા,

મિત્રો  છે  લાકડિયા  લાલા !

 

શબ્દોમાંથી  ઝરતું  માખણ,

કેવા  તો  વાતડિયા  લાલા !

 

હોય  ભલેને  પ્રશ્નો  અટપટ,

ઉત્તર  દે  તડફડિયા  લાલા !

 

ચપટીક  માટી  આરોગી લો,

સારાં  છે  ચોઘડિયાં  લાલા !

 

ચૌદ  ભુવન  સાથે બતલાવી,

એમ  થયા  માવડિયા  લાલા.

 

હોય  ભલે  દ્વારિકાના  રાજા,

મૂળે  તો  ગામડિયા  લાલા !

 

તીર  ભલે  ખૂંપ્યું  હો  પગમાં,

મારે  ના  તરફડિયા  લાલા.

 

તારી  વાતું  લખવામાં  તો,

ખૂટે શબ્દ ને ખડિયા લાલા !

 

 

*લાલાની ગઝલ – ૫*

 

તને  જોઈ  હું  હરખું લાલા,

એક  તને  હું  પરખું  લાલા.

 

નેહભર્યાં  લોચનિયાં  જોવાં,

આંખે અઢળક તરસું લાલા !

 

હોય  નજર  સામે તું  કાયમ,

તોય  તને  હું  વલખું  લાલા.

 

દર્શન સ્હેજ મળે પળભર તો,

હું  ચોધારે  વરસું  લાલા !

 

એકલતા  પણ  કેવી  રુડી !

મલક મલક બસ મલકું લાલા.

 

તું  દ્વારામાં  મબલક  મ્હાલે,

હું   શેરીમાં   ભટકું   લાલા.

 

બારે   મેઘ  થયાં  છે   ખાંગા,

બોલ,  હવે  શું  કરશું લાલા ?

 

ગોકુળ-મથુરા  અમે જાણીએ,

તારે  સઘળું  સરખું  લાલા !

 

( સ્નેહલ જોષી )

વિશ્વાસ લઈ-શૈલેન રાવલ

સૂર્યના સંગાથનો વિશ્વાસ લઈ,

પાંગર્યો છું ડાળનો વિશ્વાસ લઈ.

 

ઊભવાનું હોય તો ઊભા રહો,

આયનાના સાચનો વિશ્વાસ લઈ.

 

કેટલા દરિયા વટાવી જાય છે,

એક પીછું પાંખનો વિશ્વાસ લઈ.

 

દોડજે તું શસ્ત્ર લઈ ફરિયાદનું,

હું ફરું સંવાદનો વિશ્વાસ લઈ.

 

જીવવું તો એ જ સાચું જીવવું,

આપણા અજવાસનો વિશ્વાસ લઈ.

 

અસ્તનો મતલબ નવેસર ઊગવું,

આવનારી કાલનો વિશ્વાસ લઈ.

 

( શૈલેન રાવલ )

લાગણીઓ વેચવા-સાહિલ

જીવવા જેવું નથી જે ગામમાં,

ત્યાં વીતાવ્યું આયખું આરામમાં.

 

લાગણીઓ વેચવા આવ્યો હતો,

હું જ વેચાઈ ગયો લિલામમાં.

 

એ જ ક્ષણથી નીંદથી કિટ્ટા થયો,

જે ક્ષણે સપનાં મળ્યાં ઈનામમાં.

 

એ ય એળે આયખાંં જેમ જ જશે,

આ સુરા રેડો ગળેલા જામમાં.

 

ઘરેથી ચિક્કાર પીને નીકળ્યો,

ભાનમાં આવ્યો નશાના ધામમાં.

 

હોઉં છું જ્યારે તમારા આંગણે,

હોઉં છું જાણે હું તીરથધામમાં.

 

હું મને ‘સાહિલ’ મળું તો શી રીતે,

હું જીવું છું સાવ ખોટા ઠામમાં.

 

( સાહિલ )

અલગ છે-મયંક ઓઝા

સાંજનું ઢળવું અલગ છે,

જાતનું બળવું અલગ છે.

 

એ પ્રતીક્ષાની પળોમાં,

ખુદનું ઓગળવું અલગ છે.

 

ચોતરફ ભટક્યા પછીનું,

ઘર તરફ વળવું અલગ છે.

 

શ્વાસને ઉચ્છવાસ જેવું,

આપણું મળવું અલગ છે.

 

કોઈના આંસુ લૂછીને,

સહેજ ઝળહળવું અલગ છે.

 

( મયંક ઓઝા )