યદ્ધના પડઘમ વિચારો રક્તમાં ઘેરાય છે
બાણની પ્રત્યંચા પર પ્રશ્નાર્થ લાગી જાય છે.
.
तेन त्यक्तेन भुंज्जीथा: નો મંત્ર સાચો પાડવા
આપમેળે પાંદડીઓ નેસ્તનાબૂદ થાય છે.
.
સત્ય કેવળ એ જ છે કે હું બધાથી ભિન્ન છું,
ને સમત્વથી બધીયે શક્યતા પડઘાય છે.
.
માંસ, મજ્જા, પ્રાણ, વાયુ, અગ્નિ ને ભૂમિ બધું
કો તિલસ્મી તીરથી બસ ક્ષણ મહીં છેદાય છે.
.
સૂક્ષ્મતર ભાવે કદી માપી શકાયું ના જગત
ને સરળતમ ભાવથી આકાશ પણ વંચાય છે.
.
પિંડથી બ્રહ્માંડની વ્યાપક ગતિ આ છે બધી,
એ જિજિવિષા કરોડો ક્યાં કદી પરખાય છે ?
.
( હાર્દિક વ્યાસ )