મેં તો તને ગુલાબ નહીં
પણ ગુલાબનો ફોટો આપ્યો
અને એ ફ્રેમમાં જ
કરમાઈ ગયો.
.
( રોહિત પુરોહિત )
.
એક રાતે
ઊંઘમાં અજાણતાં
સપનાને ઠોકર મારી બેઠો
ત્યારથી
હું ઊંઘી નથી શકતો.
.
( કિશોર શાહ )
.
નગરના રાજમાર્ગ પર
એક પૂતળું
મધરાતે
સ્ટ્રીટ લેમ્પ પાસે જઈને
એટલું જ બોલ્યું
સૂરજની સ્મૃતિમાં
હવે કોડિયાં
સળગાવવાનું બંધ કરો.
.
( સાગર મહેતા )
.
સૂરજ સામે
દીવાસળી સળગાવીને
હુંશોધું છું
શાશ્વત અંધારું.
.
( કિશોર શાહ )
.
હોટેલના
ટેબલ પર ટ્રેમાં
થરમોસ પડ્યું છે
પાણીનો ગ્લાસ ઊંધો છે.
તરસ મરી ગઈ છે
અને હું જીવું છું
થરમોસની અંદર ને અંદર
જળ ભલે ઝૂર્યા કરે.
.
( સુધાકર ગાંધી )