શ્વાસ-ઉચ્છવાસની વણથંભી આ વણઝાર
ચક્કર ચક્કર ફરતી
આ દુનિયાને મેલી પડતી
ક્યાંક દૂર ચાલી નીકળીએ ઓ પાર !
ક્યાં સુધી ખમતાં રહીશું
કોમળ પાંદડીઓના આ પ્રહાર
ને
ક્યાં સુધી વહ્યા કરીશું
જનમોજનમના સંયોગ-વિયોગનો આ મિથ્યા ભાર !
ભૂંસાઈ ગયેલાં પગલાંને સૂંઘીસૂંઘીને
રિસાઈ ગયેલાં ડૂસકાંનો સંગાથ –
આખરે આપણે પહોંચવું છે ક્યાં !
ચક્કર ચક્કર ફરતાં ટાયરોની ગતિ !
ચિચિયારીથી કાન ભરાઈ ગયા છે, ધરાઈ ગયા છે;
આંખો સૂજી ગઈ છે; જાળમાં તરફડતી માછલીઓને જોઈને !
ક્યાંક ચાલી નીકળીએ, યાર !
જ્યાં ફૂલ હોય પણ બાગ ન હોય;
જ્યાં નદી નિરાંતે વહેતી હોય; પણ ઓવારો નહીં હોય;
જ્યાં જંગલ હોય પણ કેડી નહીં હોય;
જ્યાં કશું જ ન હોય અને એમ બધું જ હોય;
તું હોય
માત્ર
તું !
.
( ગુણવંત શાહ )
હું તો બધે જ છું જ્યાં ‘તું’ મને ઈચ્છે…!!!
હું તો બધે જ છું જ્યાં ‘તું’ મને ઈચ્છે…!!!