વાડ પર બેસીને દૈયડ ગાય છે
વાડના કાંટાઓ એનાથી સુંવાળા થાય છે
ને તમે ઘેર નથી…
.
બારીમાંથી મધુમાલતીની વેલ અંદર આવે છે
ભીંતો ઓરડાઓ મહેક મહેક થાય છે
ને તમે ઘેર નથી…
.
ચાંદની આવીને પથારીમાં બેસે છે, પછી-
સૂનમૂન પંખી પણ કલરવતું થાય છે
ને તમે ઘેર નથી…
.
કેટલા દિવસો પછી એક પતંગિયું
આજે આવ્યું છે ઘરમાં ને
ફરફરે છે હવા શું બધેબધ
કણકણમાં કોઈ રણઝણ રણઝણ રણઝણે છે
ને તમે ઘેર નથી…
.
પહેલો વરસાદ અને માટી પણ મહેક મહેક
છાતીમાં આરપાર મારમાર
તારતાર વાછટો વાય છે
ને તમે ઘેર નથી…
.
શ્રાવણમાં ભીંજાતા તડકાઓ સંગાથે
આખ્ખુંયે ઘર હવે ઓગળતું જાય છે
ને તમે ઘેર નથી…
.
વેલાથી લીલેરી વાડ ખુદ ગાય છે
કે તમે ઘેર નથી…
.
( મણિલાલ હ. પટેલ )
સાચી વાત છે કે – ને તમે ઘેર નથી…
સાચી વાત છે કે – ને તમે ઘેર નથી…