તારા ગણવાથી રાત પૂરી ન થાય
હવે તારા ગણવાથી વાત પૂરી ન થાય
એકલવાયા રે સખી, ઘરના રહેવાસ એમાં આવા ને આવા ઉજાગરા
ફાગણના દિવસોમાં ફળિયે તો ઠીક, મારાં લોચનમાં મ્હોર્યાઁ છે ખાખરા
.
લંબાતી ઝંખનાને છેડો નહીં ક્યાંય
હું તો પગલે પગલે રે સાવ તૂટું
કાંકરીઓ વાગવાથી ફૂટતી’તી હેલ્ય
હવે એવા દિવસો કે હું જ ફૂટું
આથમણી મેર ડૂબે સૂરજ છતાં ય મારે રોમ રોમ તડકાઓ આકરા
.
કોડ ને કમાડ કદી ઘૂંટેલા લાભશુભ
રાતું ચટ્ટાક હજી જાગે
ઓસરીમાં આભલાનું તોરણ
તે કોઈ એક આવે તો કેટલાય લાગે
ભણકારો સ્હેજસાજ વાગ્યાથી લોહીઝાણ થઈ જાતા જોયાના કાંગરા
.
( રમેશ પારેખ )
હવે તારા ગણવાથી રાત પૂરી ના જ થાય…!!! ના જ થવી જોઈએ…!!!
હવે તારા ગણવાથી રાત પૂરી ના જ થાય…!!! ના જ થવી જોઈએ…!!!