.
પગતળે ઈચ્છાનું ભાષાન્તર કરું
થાકના ચ્હેરાનું ભાષાન્તર કરું
.
ફૂલથી કોમળ હવાની છું શરત-
રેશમી ટહુકાનું ભાષાન્તર કરું
.
હું સમયની રેતમાં ઊંડે ગયો-
ધૂળમાં પગલાંનું ભાષાન્તર કરું
.
હું અજાણ્યા સૂર્યની નજીક ડૂબ્યો-
સાંજ છું, તડકાનું ભાષાન્તર કરું
.
હું જ મારી સંધિ ને મારો સમાસ
શૂન્યથી ઘટનાનું ભાષાન્તર કરું
.
કોઈ સુક્કા પાંદની છું ઓળખાણ
વૃક્ષના નકશાનું ભાષાન્તર કરું
.
( અજય પુરોહિત )