.
ભરેલું પાત્ર ઢોળીને બધાનું ધ્યાન ખેંચે છે.
સરોવર સાવ ડહોળીને બધાનું ધ્યાન ખેંચે છે.
.
ધરીને ધ્યાન ઊભો એ જ બગલો શાંત પાણીમાં,
અચાનક ચાંચ બોળીને બધાનું ધ્યાન ખેંચે છે.
.
નથી વાવ્યું-ઉછેર્યું ઝાડ એણે તોય એ પાછો-
અકારણ પાન તોડીને બધાનું ધ્યાન ખેંચે છે.
.
હતું ખંડેર જેવું ઘર હજી છે એમનું એમ જ,
ફક્ત દીવાલ ધોળીને બધાનું ધ્યાન ખેંચે છે.
.
નથી કૈં પંથ નક્કી કે પ્રયોજન પણ નથી નક્કી,
અમસ્તો સાવ દોડીને બધાનું ધ્યાન ખેંચે છે.
.
પ્રથમ સૌ મારતા ભેગા મલીને હાથમાં ખીલા,
પછી બે હાથ જોડીને બધાનું ધ્યાન ખેંચે છે.
.
( નીતિન વડગામા )
ખૂબજ સુંદર !
ખૂબજ સુંદર !