નદીને પૂછો, ગગનને પૂછો, ધરાને પૂછો શું પૂછવું છે,
હજાર પ્રશ્નો છે સૌની પાસે, બધાને પૂછો શું પૂછવું છે.
.
નથી અમે કંઈ અમારા ઘરમાં ઉછીનું અજવાળું લઈને બેઠા,
અમારા દીવા સળગતા રહેશે હવાને પૂછો શું પૂછવું છે.
.
અમારી નેકી-બદીનો આખો હિસાબ મોઢે કરી લીધો છે,
ઉઠો ફરીશ્તા, તમે તમારા ખુદાને પૂછો શું પૂછવું છે.
.
અમારા જખ્મો, અમારી પીડા, અમારી બીમારી ત્યાંની ત્યાં છે,
તબીબ પાસે જવાબ માગો, દવાને પૂછો શું પૂછવું છે.
.
સફર છે લાંબી ને રસ્તો ટૂંકો, છે રાત થોડી ને વેશ ઝાઝા,
કરી આ કોણે દશા અમારી દિશાને પૂછો શું પૂછવું છે.
.
દરેક વાતે કશુંક ખૂટે, વિચાર ટાંકો ને ટેભાં તૂટે,
યુગોથી બેઠી છે આ પનોતી, દશાને પૂછો શું પૂછવું છે.
.
ખલીલ, સૌમાં રહ્યો છે માણસ ને માણસાઈ મરી ચૂકી છે,
હયાતી પાસે જવાબ ક્યાં છે, ફનાને પૂછો શું પૂછવું છે.
.
( ખલીલ ધનતેજવી )
ખૂબજ સુંદર !
ખૂબજ સુંદર !