છત કે છત્રી પર વરસવાનું મને ફાવે નહીં,
હું છું ચોમાસું, અટકવાનું મને ફાવે નહીં.
.
ફૂલ જો રાખો બિછાવી તો વળી આવી જશું,
ઠોકરો ખાતાં સિસકવાનું મને ફાવે નહીં.
.
હું સતત પહેરું મને ગમતા ભરમનો અંચળો,
મોસમોની જેમ ફરવાનું મને ફાવે નહીં.
.
હું જડીબુટ્ટીનો પર્વત ઊંચકી લાવી શકું,
પણ ચરણમાં પુષ્પ ધરવાનું મને ફાવે નહીં.
.
માતૃભાષાને કરું વંદન ગઝલ ને ગીતથી,
બોલી બોલીને વિરમવાનું મને ફાવે નહીં.
.
( મધુમતી મહેતા )
Excellent
Excellent