શબ્દની ગહેરાઈમાંથી નીકળ્યાં છે તું અને હું.
તેજની તનહાઈમાંથી નીકળ્યાં છે તું અને હું.
.
કંટકોનાં રાજ્ય છે ને શૂળના ત્યાં કાયદાઓ,
ફૂલની રુસવાઈમાંથી નીકળ્યાં છે તું અને હું.
.
વાત લઈને વાયરાઓ વાય છે ચારે દિશામાં,
વાતની વડવાઈમાંથી નીકળ્યાં છે તું અને હું.
.
ના મળ્યાં પળની પછીતે કે પ્રલયના અંધકારે,
પ્રેમની પરછાંઈમાંથી નીકળ્યાં છે તું અને હું.
.
જ્યાં નથી પડઘો કે પડછાયો કે ભણકારો હવામાં,
સ્તબ્ધતાની ખાઈમાંથી નીકળ્યાં છે તું અને હું
.
આજ કિસા ગૌતમીની શોધ પૂરી થઈ ગઈ છે,
એક ચપટી રાઈમાંથી નીકળ્યાં છે તું અને હું.
.
( મધુમતી મહેતા )