હલેસાંને સુકાની ના સમજતા,
તમે આ વાત નાની ના સમજતા.
મને છે ટેવ કાયમ ચોંકવાની,
એ મારી સાવધાની ના સમજતા.
સૂરજ ઊગ્યો, તો ફાળો આપણો શું ?
ડૂબે તો નુકસાની ના સમજતા.
હવે દો એને ચહેરાનો દરજ્જો,
બુકાનીને બુકાની ના સમજતા.
મને અજવાશનો એ માત્ર નિમિત્ત,
દીવાની મહેરબાની ના સમજતા.
ચૂકે, પણ લાગવા ના દે કે ઝૂકયું,
એ મસ્તકને સ્વમાની ના સમજતા.
વધુ પડતું કોઈ સંસ્કારી લાગે !
તો એને ખાનદાની ના સમજતા.
( ભાવેશ ભટ્ટ )