ચિંતામાં ક્યાંક, ક્યાંક વલોપાતમાં હતો,
અંતે ય એ હતો જે શરૂઆતમાં હતો.
મારામાં જંપલાવીને કોઈ મર્યું અને,
કોરી નદીની જેમ હું આઘાતમાં હતો.
આખું અસત્ય સત્ય બનીને ઊભું હતું,
જબરો રૂઆબ એની રજૂઆતમાં હતો.
આંખો ખૂલી પછી જ આ સમજી શકાયું છે,
સરખો જ અંધકાર દિવસ રાતમાં હતો.
નાસી છે લાગ જોઈને બિલ્લીપગે નદી,
વાદળની સાથે પહાડ મુલાકાતમાં હતો.
થોડોઘણો હું એટલે પ્રખ્યાત થઈ ગયો,
ઉલ્લેખ મારો તારી બધી વાતમાં હતો.
( ભાવિન ગોપાણી )