પહાડોએ કદી લૂંટ્યો, કદી પડઘાએ લૂંટ્યો છે,
કદી ઈચ્છા ગઈ લૂંટી, કદી શમણાંએ લૂંટ્યો છે.
.
અનોખી ભેટ આપી છે, તમે આ રાહ ચીંધીને,
દિશાઓએ કદી લૂંટ્યો, કદી નકશાએ લૂંટ્યો છે.
.
નથી અકબંધ હું જીવ્યો, સલામત હોઉં હું ક્યાંથી ?
કદી તૃષા ગઈ લૂંટી, કદી ઝરણાંએ લૂંટ્યો છે.
.
કરમ છે બેઉના સરખાં, દુઆ બંનેની સરખી છે,
કદી પાયલ ગઈ લૂંટી, કદી પગલાંએ લૂંટ્યો છે.
.
ફકીરી હાલ આ કંઈ ‘પ્રેમ’નાં અમથા નથી યારો,
કદી મંઝિલ ગઈ લૂંટી, કદી રસ્તાએ લૂંટ્યો છે
.
( જિગર જોષી ‘પ્રેમ’ )