તમારી શરાફત નડે છે અમોને
અમારી શરાફત નડે છે અમોને
.
હતો ખ્યાલ એવો કે સંધાઈ જાશે
કરી જે મરામત નડે છે અમોને
.
સહ્યાં દ્વેષ ઈર્ષા ને અન્યાય પળેપળ
હવે તો અનાગત નડે છે અમોને
.
અહીં પ્રેમ પૂજ્યો પ્રભુના સ્વરૂપે
છતાં જે લખ્યા ખત નડે છે અમોને
.
અસ્મિતા અહમનો નથી ભેદ ઝાઝો
છતાંયે તફાવત નડે છે અમોને
.
ધરમના જ નામે ચલાવી રહ્યા છો
તમારી બગાવત નડે છે અમોને
.
( મેઘબિન્દુ )
વાસ્તવિક નિરૂપણ કવિતા
વાસ્તવિક નિરૂપણ કવિતા