સખી, પીડા તો પિયરનું વહાલસોયું ગામ.
સખી, પીડા તો અંગતના આંગણાનું નામ.
.
સુખ આપે પોતાનાં એવું કોણે કીધું?
દુઃખ દે છે પરાયાં એવું માની લીધું!
સખી, સુખ અને દુઃખ તો રાધા ને શ્યામ.
સખી, પીડા તો પિયરનું વહાલસોયું ગામ.
.
હોય આંસુ અઢળક એ તો મોટાં છે ભાગ,
કોણ આંસુ વિણ અંતરની ઓલવશે આગ?
સખી પારકાના પાણીનું આપણે શું કામ?
સખી, પીડા તો પિયરનું વહાલસોયું ગામ.
.
હશે વૈશાખી તાપ તો આવશે અષાઢ,
ઊગે ઊજળું પ્રભાત હશે અંધારું ગાઢ,
સખી, સમજણના સથવારે જીવવાનું આમ.
સખી, પીડા તો પિયરનું વહાલસોયું ગામ.
.
વેદના ને વહાલ તો બે સખીઓનો સાથ,
એક હશે આગળ બીજું પાછળ સંગાથ,
સખી, દુ:ખો તો સાવ કાચાં ઠ્ઠીકરાનાં ઠામ.
સખી, પીડા તો પિયરનું વહાલસોયું ગામ.
.
( ઈસુભાઈ ગઢવી )
મોરપીંછ 