કોને ખબર કે ક્યાંથી આ આવ્યો છે અંધકાર ?
અહિંયા અનાદિકાળથી વ્યાપ્યો છે અંધકાર !
.
પડખું ફરી ઉજાસ તો પોઢે નિરાંતથી,
કંઈ કેટલીય રાત તો જાગ્યો છે અંધકાર !
.
પ્યાલા ભરીને પીધી હશે ચાંદની તમે !
ચમચી ભરીને કોઈ દિ ચાખ્યો છે અંધકાર ?
.
ઘાંઘો ઉજાસ રોજ ટકોરાય બારણે,
બંધ ઓરડાએ સાચવી રાખ્યો છે અંધકાર !
.
લિસ્સી ને કોરી ભીંતનું અસ્તિત્વ ક્યાં રહ્યું ?
ખરબચડી કંઈ હથેળીએ થાપ્યો છે અંધકાર !
.
અજવાળું સાવ છીછરું લાગી રહ્યું હવે,
ઘુવડની આંખથી અમે તાગ્યો છે અંધકાર !
.
લાગે છે બહુ દરિદ્ર સિતારા ભરેલી રાત,
જાણે કે ઠેરઠેરથી ફાટ્યો છે અંધકાર !
.
( પરેશ કળસરિયા )