કોઈ નથી-ના આ બંધ ઓરડામાં
આંટા મારતી
મારી એકલતાના કાનમાં
તમે ‘હું છું ને’ એટલું જ બોલ્યાં હોત
તો હું જીવી ગયો હોત,
મરણના મારગે આ ચરણ ઉપડ્યા ત્યારે
તમે માત્ર ‘ઊભા રહો’ એટલું જ કહ્યું હોત
તો હું જીવી ગયો હોત;
મુખ પર ઢંકાયેલી
મૃત્યુની ચાદરને સહેજ આઘી કરીને
તમે માત્ર ‘કેમ છો?’ એટલું જ પૂછ્યું હોત
તો હું જીવી ગયો હોત
આમ તો કદાચ
મરવા કરતાં જીવવાનું જ સહેલું હતું
પણ…તે મારા હાથમાં નહોતું !
.
( જયંત પાઠક )
ખૂબજ માર્મિક ભાવ સાથેની રજૂઆત ! અતિ સુંદર.
ખૂબજ માર્મિક ભાવ સાથેની રજૂઆત ! અતિ સુંદર.